स्वरचित कविता व गीत व संग्रह
वृत्त
स्त्रग्विणी
*गालगा गालगा गालगा गालगा*
साजना गीत हे का नवे वाटते
ते शहारे मला का हवे वाटते
आज माझ्या सुरांना तुझा सूर दे
रंगले ओठ की चांदवे वाटते
सांग कोठे कशी दाखवू त्या खुणा
आणखी त्या हव्या तुजसवे वाटते
फूल ते ही मुके त्या कशी मी पुसू
स्वप्न त्या वेळचे गोडवे वाटते
कोंडले मी जरी कोश माझाच तू
बाहुपाशी झरो आसवे वाटते
रचना
शिल्पा म वाघमारे
सहशिक्षिका बीड
गझल
वृत्त : भुजंगप्रयात
लगागा लगागा लगागा लगागा
कशाचे पुन्हा भेटणे बोलणे रे
कुठे आसवांचे घडे ओतणे रे...
तुझ्या आठवांची जपूनी कुपी ही
मनाने मनाशीच समजावणे रे...
फुले जी कधी तू दिली ओंजळीत
पुन्हा गंध लेणे पुन्हा सांडणे रे ...
मला का सदा हा छळे दृष्ट वारा
बटांनो नको ते पुन्हा गुंतणे रे ...
कुणी वाट माझी करा मोकळी हो
अता फक्त स्वप्नात त्या रंगणे रे...
शिल्पा म. वाघमारे
सहशिक्षिका बीड
19.08.2022
प्रीत गझल
वृत्त :मनोरमा
गालगागा गालगागा
प्रीत
मंद वारा शीत होता
गात माझे गीत होता
वाट वाटे एकटीची
सोबती तो मीत होता
पाखरांच्या चाहुलीने
वेडुला का भीत होता
सागराची लाट येता
ओंजळीने पीत होता
उष्ण लाटा साहलेल्या
त्या बिजाची जीत होता
विठ्ठलाने दान द्यावे
त्या प्रतीची प्रीत होता
******************
रदीफ : होता
कवाफी : शीत, गीत, मीत, भीत,पीत, जीत, प्रीत
अलामत : ई
रचना
शिल्पा म वाघमारे
सहशिक्षिका बीड
सांग ना साजना का असे वागणे
श्रावणी रात्रीने पापणीत जागणे
मी अशी एकटी भार ना पेलवी
फक्त ते एकदा मागते चांदणे
साहवे ना अता आठवे रात ती
त्या तिथे ते पुन्हा एकदा भेटणे
शब्द साधे तुझे पाकळी पाकळी
मंद वाऱ्यासवे आपुले वाहणे
तू छळावे मला मोहरावी तनू
रोखुनी तू नजर काळजा भेदणे
शिल्पा म वाघमारे
सहशिक्षिका बीड
रदीफ : नाही - - -
कवाफी : वागणे, जागणे, चांदणे, भेटणे, वाहणे, भेदणे
अलामत : अ
मेनका:गालगागा गालगागा गालगा
माधवा
मीच माझी माधवा ना राहिले
श्वास सारे याच पायी वाहिले
गुंतलेले मी सदा नामी तुझ्या
का न तू माझ्याकडे रे पाहिले
तप्त होते मार्ग सारे येथले
जन्म ते मी कैक होते साहिले...
रुप ते शामा मलाही दाखवी
अर्जुनाला तूच होते दाविले
मोक्ष, मुक्ती सिद्धतेची राम का
आठवांच्या राम गंधी वाहिले
रचना
शिल्पा म वाघमारे
सहशिक्षिका बीड
रदीफ - नाही
कवाफी - राहिले, वाहिले, पाहिले, साहिले, दाविले, वाहिले
स्थिर अक्षर - ले
अलामत - इ
