शृंगार मनाचा हरीनामाचा
फक्त एक नाम तुझे
कानी पडते ज्या क्षणी
तेच डूल शोभते, डुलते
लटकते जणू हिरकणी...१
नामगंधाने मोहरे पवन
अंगअंगी रोमांच उभे
नासिकेस का हवी नथ नि
चित्तास शांतता लाभे... २
या अधरांवर, नामबासरी
कृष्णराग अविरत गाते
ओठी, गाली येते लाली
बेगडी शृंगारा लाजविते... ३
तनमन हे रंगले, दंगले
पैंजणाविना हे नाद कसे?
तुझिया अर्पण 'मी' पण आता
शृंगार दुजा मज ठाव नसे... ४
रचना
श्रीमती. शिल्पा म वाघमारे
सहशिक्षिका
बीड
कोणत्याही टिप्पण्या नाहीत:
टिप्पणी पोस्ट करा