काव्यप्रकार-अष्टाक्षरी
गाव... अमृताचा ठेवा
गाव निसर्गदर्पण
नित्य अमृताचा ठेवा
गाव शब्दांत मावेना
फिरकेना हेवादावा ||१||
गाव हिरव्याचं लेणं
माय धरेचं माहेर
ओल्या गंधात न्हालेला
दिव्य चैतन्य आहेर ||२||
मने स्वर्गाची दालने
विकारांचा विरघळ
सांज श्याम स्मितखळी
सुखाचाच परीमळ ||३||
आकर्षितो जगतास
साधेपणा, सहजता
काळ्या आईच्या मायेची
हिच खरी विशेषता ||४||
ओव्या, अभंगाचा वसा
गती देई जगतास
जरी वाहे तंत्रज्ञान
गाव जपे संस्कृतीस ||५||
म्हणवून 'त्या' अडाणी
बोट दावते शहर
तया सांगेल का कुणी
गाव 'ज्ञानाचा सागर' ||६||
खरी श्रीमंती सृष्टीची
आहे गावाच्या मातीत
हरवला हा सुगंध
शहराच्या डोलार्यात ॥७॥
अंतरावी न अंतरे
येता 'मी' पणा तोऱ्यानं
आग पाखडता वाणी
भडकावे न वाऱ्यानं ||८||
कोमेजून आपुलकी
नको झापड मनाला
रंग उधळू दे चित्ती
विनवते श्रीरंगाला ||९||
आहे सजलेले सदा
आदर्शांच्या तोरणांनी
माझ्या भारताचा गाव
शोभातोय विश्वांगणी ||१०||
रचना
शिल्पा म वाघमारे
स शि मालेगाव खुर्द ता
कोणत्याही टिप्पण्या नाहीत:
टिप्पणी पोस्ट करा