कांचनसंध्या
आयुष्याच्या सायंकाळी
सरलेली स्वप्ने सारी
देही गलितगात्र या
ना कसलीच का उभारी... 1
श्वासांच्या आकडेमोडी
अन् शून्यात पुन्हा हरवणे
निमिषातून निर्मिले होते
कधी पुन्हा तया आठवणे...2
मी तुझी साथ नि तू
माझा रे नित्य आधार
तुझ्या सोबतीने जीवनांगणी
हा चांदण्यांचा बहर... 3
चल ओवू पुन्हा ती
मौक्तीके ओघळलेली
ती बकुळफुले आजही
मधुगंधात नाहलेली...4
स्वप्नकलिका उमलता कैक
कोमेजल्या ना रे अबोली
कर्तव्यजळी विरल्यात बावऱ्या
संसार बंधनी पाऊले गुंतली... 5
या वळणावर घे अनोखा विसावा
चिलीपिली उडाली सोडून घरटा
क्षितिजावरचे लेऊ रंग चल
खुणावती बघ ओल्या वाटा... 6
रचना
© शिल्पा म वाघमारे
स शि बीड
भ्र क्र 9527054205
३०/१२/२०२०
कोणत्याही टिप्पण्या नाहीत:
टिप्पणी पोस्ट करा