*बालशब्दस्पंदन...*
साहित्याची नांदी येईल
भवितव्यासाठी होईल प्रेरणा
इवल्या डोळ्यांत चमकेल
आत्मविश्वास अन् चेतना...१
बालग्रामच्या अंगणात उद्या
किलबिलती पाखरे गोजिरी
स्वयंप्रकाशी ध्येय ऊरी अन्
बरसतील निर्मळ आनंदसरी...२
काव्यमंजिरी दरवळून टाकील
कथांत रमतील थोरसान
बिनधास्त झेप साहित्याकाशी
घेताना मग नुरेल भान...३
गोष्टरंगचा इंद्रधनू भुलवेल
मुलाखतीत मन हरवेल
गीतमालांच्या मंजूळ वाणीने
तार काळजाची झंकारेल...४
प्रेरिका असेल ती घटीका
स्वप्नवाट प्रकाशणारी
सुखस्वप्नांच्या जगतामधुनी
विश्वास सत्याचा देणारी...५
शब्द होऊन स्पंदने हृदयीची
देतील जगण्याला नवा श्वास
आस घेईल नभी उत्तुंग भरारी
मळभ सारुन तरारेल ध्यास...६
रचना
©शिल्पा म वाघमारे
सहशिक्षिका
जि प प्रा शाळा मालेगाव खुर्द
ता गेवराई जि बीड
दि. ४.२.२०२०
कोणत्याही टिप्पण्या नाहीत:
टिप्पणी पोस्ट करा