चला रे भिजायला...
गार गार आला वारा
संगतीला पाऊसधारा
शुभ्र टपोऱ्या या गारा
....... चला वेचुया रे चला चला वेचुया ||१||
फांदी फांदी लगडली
जांभळांनी गर्दी केली
वाऱ्यानेही साथ दिली
....... चला खाऊया रे चला खाऊया
||२ ||
डोळे कसे वटारतो
बेडूकदादा डरावतो
डबक्यात कसा राहतो
....... चला पाहुया रे चला पाहुया ||३||
नदी वाहे खळखळ
पानोपानी सळसळ
गोड गातोया कोकिळ
.......चला शोधुया रे चला शोधुया ||४ ||
राजा डोंगर सजला
मोर खुलला, नाचला
पोर पोर उंडारला
....... चला नाचूया रे चला नाचूया ||५||
भिजूनिया होऊ चिंब
रान पाखरांच्या संग
उधळू आनंदाचे रंग
....... चला रंगूया रे चला रंगूया... ||६||
रचना
© शिल्पा म वाघमारे
स शिक्षिका
मालेगाव खुर्द ता गेवराई जि बीड
दि १३.७.२०२०
कोणत्याही टिप्पण्या नाहीत:
टिप्पणी पोस्ट करा