आद्यप्रेरणा काव्याची*.... *संतश्रेष्ठ श्री ज्ञानेश्वर महाराज*

आद्यप्रेरणा काव्याची*....      

*संतश्रेष्ठ श्री ज्ञानेश्वर महाराज*

देव होऊन जावे का
भुलोकी ज्ञान द्यावयासी
की निराळे काही करावे
अज्ञान मिटवावयासि        ||१||


विचारांती देवाधिदेवाने
निर्धार असेल का केला? 
स्वये पांडुरंगच भुलोकी
ज्ञानदेवरुपे अवतरला     ||२||


विठ्ठल-रूख्मिणीच्या पोटी
जन्माष्टमी मुहुर्ताला
ईश्वरच जो ज्ञानाचा 
ज्योतिर्मय साकारला       ||३||    


बंधू निवृत्ती, सोपान
सवे मुक्ताई इवली
एकाचढी एक थोर
जणू दिव्य रत्नवेली        ||४||


पोरं ही संन्याशाची
जन त्यांस हिनवती
रेड्यामुखी वदवूनी
वेद दावियली दिप्ती       ||५||


परार्ध सहस्ररश्मींचे
तेज ते स्वयंप्रकाशी
त्रिखंडातही तुलना
न होई त्या कोणाशी       ||६||


ज्ञानफुले जी माधवाच्या
श्रीमुखातून सांडियली
सिद् ध ज्ञानदेवे तया
दिपिकेत गुंफियली         ||७||


परम् पदाची उन्मनी
अशी साधली साधली
सच्चिदानंदबाबांसाठी
चिरसंजीवनी जाहली      ||८||


शुद्ध झरे ते प्रवाही
सुधा जणू गवळणी
जगण्याचा सार सांगे
होऊन कृष्णविरहिणी      ||९||


प्रेमपान्हा माऊलींचा
ओवी 'अमृतानुभवाची'
आद्यप्रेरणा तीच  खरी
या साऱ्या साहित्यिकांची  ||१०||


त्यांच्याच कृपामृतांचे
सिंचन माझ्या शब्दवेलींना
त्याच पदकमली अर्पिते 
उमलत्या काव्यकलिकांना ||११||

रचना
शिल्पा म.वाघमारे
सहशिक्षिका जि प प्रा शाळा, 
मालेगाव खुर्द
ता गेवराई जि बीड
10/6/19,