डाव अधुरा

*डाव अधुरा*

हरवलेल्या क्षणांची राजसा
निसटली हलकेच ओंजळ
आठवांत सुखद भिजताना
प्रश्न पुन्हा विचारे काजळ... १

काय सांगू तयास आता
जे मलाही न उमजले
प्रश्नांचा खच पडलेला
उत्तर तरी न मज दिसले...२

मनाच्या त्या कोपऱ्यात
दडून आहे अजूनही आशा
निराशेच्या तूफानांनी जरी
भंग पावल्या साऱ्या दिशा...३

का? कसे? अजुनही
मी कारणांस शोधते आहे
उत्तर सांगेल का हो कोणी
का प्रेम करणं गुन्हा आहे..?४

निरपेक्षतेतही मला का
लाभल्या अनंत यातना
श्वास फक्त वाहतो आहे
उरली नच संवेदना....५

"दोष तुझा" मी म्हणत नाही
नशीबाचा प्याला कसा सांडला
न कळे कुण्या जन्माचा नियतीने
डाव तो अधुरा पुन्हा मांडला...६

रचना
©शिल्पा म वाघमारे
सहशिक्षिका बीड
दि १३.०४.२०