खारुताई
इटुकली गोजिरी तू
सानुकली खारुताई
सरसर लगबग
चढूनिया वर जाई... १
लगबग कसली ही
तुला कसली ग घाई
इवल्याशा पायांनीच
तुरुतुरु धाव घेई ...२
टुकूटुकू बघतेस
गोल टपोऱ्या डोळ्याने
शेपटीचा झुबका तो
मिरवीशी तू तोऱ्याने.. ३
शेंगा भुईमुगाच्याही
कडाकडा फोडूनिया
गालांमध्ये गोबऱ्या त्या
तोबराच भरुनिया...४
भागूबाई भित्रीच तू
कानी येता चाहूलही
बघ शिवबासम मी
भीत नाही कोणासही...५
बिया जमवून ठेवी
भुईमध्ये लपवून
विसराळू नार अशी
जाशी मग विसरून...६
सर येता आपसूक
सारे रान अंकुरते
नकळत खाऊताई
रुजवण शिकवते... ७
आजी सांगे रामकथा
मज सेतूबंधनाची
इवलासा देई वाटा
थाप घेई कौतुकाची... ८
रचना
© शिल्पा म.वाघमारे
सहशिक्षिका बीड
चाखून बघ ना गं खारु
मधुमकरंद सये आणला
सोनसळी किरणे वाट पाहती
जाऊ लपाछपी खेळायला
कोणत्याही टिप्पण्या नाहीत:
टिप्पणी पोस्ट करा