नवरंग नवविचार..... पण 'ती'

💫नवरात्र..नवरंग..नवविचार💫


      👧🏻 *पण'ती'* 👧🏻
🌈
नवरंगांचा हा साज लेऊनी
सये विचार रुजवूया नवा
पण'ती च असे जर मालवलेली
मग तेवेल का वंशदिवा?.... *१*

💜
*जांभळा* जागवी संयम मनाचा
क्षोभ-शांतीचा जो अजब मिलाप
'ती' आदरमुर्ती,नसे विषयवस्तू
विझवी नरा तव विकारांचे ताप... *२*

🌕
*पीत* रंग सांगतो सदा
मनभावना जपा कोमलतेची
लेक जन्मली जर घरी तुमच्या
गुढी उभारा तेथ आनंदाची... *३*

💚
अस्तित्व स्त्रीचे माहेरी- सासरी
असे समृद्धी जीवन वेलीची
रंग *हिरवा* वदे संदेश अटळ
निर्माती ती खरी जगत् वंशाची... *४*

⚪
निर्मळता आणि औदार्य
*श्वेत* संकेत देई पावित्र्याचा
देऊया समान अधिकार
चला दुहितेसि शिक्षणाचा... *५*

🔶
दिव्यज्ञान जागवी *नारंगी*
प्रदिप्त करितसे आभा
नारी ही माता भगिनीसम
मनी वसू द्या सन्मानप्रभा... *६*

🔳
*करडा* रंग वदे तटस्थता
अंतराचे मूळ तत्त्व नित्य
तटस्थता तीच नजरेत असावी
अबला नाही ती हेच सत्य... *७*

🔴तीच ऊर्जा, शौर्या, चैतन्याही

अर्पित वाहे ममत्व निर्मला

'तांबडा' खुणावे सावध होण्या

अन्यायाविरोधी तीच अनलज्वाला
... *८*

🔵
*नील* रंग तो अथांगतेचा

विशालता नि अद्वैताचा
 नकोत आता स्त्रीभ्रूणहत्या 
संहार करा त्या कुविचारांचा... *९*

🌸

दिलखुलास हो 'गुलाबी'

रंग प्रितीचा विशुद्ध

पुरे पुरे चर्चा बाष्कळ

सदाचरणास होऊ सिद्ध... *१०*

✍️ ✍️ ✍️
  र च ना
शिल्पा म.वाघमारे
स.शि मालेगाव खुर्द
ता गेवराई जि बीड
दि.14.10.2018