🎵स्वागतगीत... स्वागतम्... ATM

 सुस्वागतम सुस्वागतम स्विकारा स्वागता... 2

मान्यवरांच्या पदस्पर्शाने पावन झाली अवनी
स्वागत करूया चला तयांचे शब्द पुष्प उधळूनी
||धृ||

साहित्याच्या उद्यानी, आनंदी फुले उमलली
क्षितिजावरती जणू उधळली, आनंदाची लाली
तमोरूप भावना लोपली, सूर्य साज लेऊनी
स्वागत करूया मान्यवरांचे, शब्द पुष्प उधळुनी ||१||

तारांगण जणू अवतरलेले, साहित्याच्या अंगणी
रंग उधळला वाऱ्यानेही, इथला चहुदिशांनी
अमोल आशिषांचे घन याक्षणी यावे बरसूनी
स्वागत करूया मान्यवरांचे, शब्द पुष्प उधळुनी ||२||

स्वप्न साजिरे मनामनांचे, इथेच साकारले
ध्यास नवा अन् सूर नवा,हे गीत नवे उमटले
स्वरलहरींवर सानंदी,गोजिरी मने थिरकली
स्वागत करूया मान्यवरांचे शब्दपुष्प उधळूनी ||३||

रचना ✍️
© शिल्पा म.वाघमारे
     सहशिक्षिका
 जि. प. प्रा. शाळा मालेगाव खुर्द
ता. गेवराई जि. बीड
24.1. 2019