प्रभात किड्स स्कूल अकोला
बालकवीसंमेलन
छोट्या फुलपाखरांचे हे साहित्य संमेलन...म्हणजे बालशब्दस्पंदनच जणू...
बालपणाच्या सुखस्वप्नी मज
खेचत नेणारी मधूर वेणू... १
साहित्याची नांदी येईल
भवितव्यासाठी होईल प्रेरणा
इवल्या डोळ्यांत चमकेल
आत्मविश्वास अन् नवचेतना...२
प्रभात किड्सच्या अंगणात आली
किलबिलती पाखरे गोजिरी
स्वयंप्रकाशी ध्येय ऊरी अन्
बरसतील निर्मळ आनंदसरी...३
काव्यमंजिरी दरवळून टाकील
कथांत रमतील थोर नि सान
बिनधास्त झेप ही साहित्याच्या आकाशी
घेताना मग... नुरेल भान...४
प्रेरिका जणू ही घटीका
स्वप्नवाट प्रकाशणारी
सुखस्वप्नांच्या जगतामधुनी
विश्वास सत्याचा देणारी...५
शब्द होऊन स्पंदने हृदयीची
जगण्याला देतील नवा श्वास
आस घेईल नभी उत्तुंग भरारी
मळभ सारुन तरारेल ध्यास...६
बोबड्या बोलांतून
इंद्रधनूच साकारणारे
नवकल्पनांनी भान हरवणारे
इवले जरी हे रोप आजचे
या काळजाची काळजी मिटवणारे...७
रचना
©शिल्पा श्रीकांत कुलट
सहशिक्षिका
जि प प्रा मराठी कन्या शाळा बार्शीटाकळी
कोणत्याही टिप्पण्या नाहीत:
टिप्पणी पोस्ट करा