तोड जन्मबेडी
अरे संसार संसार
कधी कुणा उमगला
फक्त वाहतो प्रवाही
कुणा नाही समजला... १
कर्म आणि कर्तव्याच्या
पथावर होई स्थिर
नित्य खेचती विषय
जीवाला का रे सत्वर...२
किती सावरु सांभाळू
तोल जाता, घसरतो
वारे शुष्क चहुकडे
मनी तम पसरतो... ३
वाहुनिया टाकशील
प्रेम शुद्ध सारे जरी
अव्हेरील अविचारे
या संसारसागरी... ४
मोल नच कोठे बाकी
झाली हृदये दुष्काळी
तूच तार या विश्वागरा
येई येई वनमाळी...५
नको नको मोक्ष मज
तयासाठी ना मी वेडी
भक्ती देई तुझे पायी
तोड बापा जन्मबेडी... ६
रचना
शिल्पा म.वाघमारे
सहशिक्षिका बीड
दि ३०.०६.२०२३
कोणत्याही टिप्पण्या नाहीत:
टिप्पणी पोस्ट करा