कान्हा साजिरा गोजिरा
लळा लावी रुप तुझं
'मी' विरघळला देखता
भान हरवलं माझं... १
सावळ्या घना दाटशी
मनाकाशी सामावून
विषयांचा न लगे ठाव
जाती क्षणांत वाहून... २
किती आळवावं नाम
तृप्त होईना हे मन
संसाराच्या अनलात
पोळतेया सारे तन... ३
तुझा अफाट पसारा
तेथे माझा काय लाग
तुझ्या एक नजरेसाठी
गाते कान्हा भक्तीराग... ४
धन्य करी माझ्या जीवा
एकवार येऊनीया
श्वास, ध्यास, अन् आस
तुझ्या पायी वाहूनिया... ५
रचना
शिल्पा म. वाघमारे
स. शि. मालेगाव खु ता गेवराई जि बीड
कोणत्याही टिप्पण्या नाहीत:
टिप्पणी पोस्ट करा