येई सावळे विठाई

*येई सावळे विठाई*

पुष्पराज मनमोही
  जगी प्रतिक प्रेमाचा
      सजवला हो जयाने
           आज गाभारा देवाचा...🌹

सजविता विश्वंभरा
 राजा स्वयेंच सजला
    अल्पायुषी जो प्रसून
       बघा पावनचि झाला...🌹

भाग्य त्यांसि महाथोर
   काय आजची लाभावे
      देई संकेत मानवा
          अनासक्त तू जगावे...🌹

माझे सावळे विठाई
   देई तुझा मना ध्यास
       नाम सौरभात माझा
          भिजव ना श्वास श्वास...🌹

धन्य धन्य होवो माझा
   एक एक दिन क्षण
      जाता पावलोपावली
         नाम पेरत जाईन...🌹

माझा 'मी' ही बा तुझ्यात
  असा विरावा केशवा
    जसा पुष्पदळांमध्ये
      मंद गंध तो भिनावा...🌹

वेड लागो मज ऐसे
  अन् नुरावेच भान
    आत्मज्ञान जागवी तू
       'हर' हरीहरा मन...🌹

मनाचिया गाभाऱ्यात
 नामसुमांची आरास
    युगायुगांची पुरवी
      माये येऊनिया आस... 🌹

तुझ्या मायानगरीत
  मोहवते मृगजळ
     धाव घेई गे कान्हाई
       आता दवड ना पळ 🌹

✍🏻 *शिल्पा म वाघमारे*
सहशिक्षिका, जि प प्रा शाळा,    मालेगाव खुर्द ता गेवराई जि बीड
दि. ४.३.२०२०