आक्रोश

आक्रोश 

कुठवर राहसी उभा विटेवर
ठेवूनिया कर कमरेवर
आर्त हाकेस साद माझ्या 
              देऊन एकदा जा||१||

मांडलास पसारा या जगती 
बघ्यासारखा का तू बघशी
आवरेना आवेश हा 
            सावरून एकदा जा||२||

उरात उठले द्वंद्व किती 
उरली फक्त इथे भीती 
गुंतागुंत विचारांची या 
           सोडवून एकदा जा||३||

आचार त्यांचे झालेत भ्रष्ट 
वासनांध ते उरलेत दृष्ट 
माजलेल्या दानवांस त्या
            घेऊन  एकदा जा||४||

जीवघेणे हे किती हलाहल 
ओततसे हृदयी त्या कोमल
पांडुरंगा पुन्हा होऊनी शिवा त्या
           पचवून एकदा जा ||५||

कोणते पर्व हे कलीयुगाचे 
माजले स्तोम नित् षड्-रिपुंचे
"गीता" मनी पुनः प्रत्येकाच्या 
         उतरवून एकदा जा||६||

 रचना •••••
   शिल्पा म.वाघमारे
        *स.शि.मालेगाव खुर्द
               *ता गेवराई जि.बीड
6/5/19, 08:50 -