स्वच्छतेसाठी....
चल रे रामा, गोपू, चंदू
साथ देऊ एकमेकांना
स्वच्छ भारत करण्यासाठी
हात देऊया हातांना...
स्वच्छतेची प्रेरणा ती
मनामनातून येऊ दे
स्वच्छ शरीरात स्वच्छ मन
विचार हा स्वच्छ फुलू दे...
मी राहीन स्वच्छ नि
मगच सांगेन जगताला
त्याविना का विचार माझा
भिडेल तयांच्या हृदयाला...
पुरे ते संकल्प आता
थेट भिडूया कामाला
घर, शाळा, गाव माझा
स्वच्छ करुया देशाला...
बीज स्वच्छतेचे आता
मनामनांत रुजवूया
प्रदुषणाच्या विळख्यातून
भारतमातेला सोडवूया ...
दुषित वायू, जल, भूमीने
श्वास इथले खंगले
प्लास्टिकचे तर भावी पिढीचे
भवितव्य काळोखी कोंडले...
उमलाया मग उषा नवी
चला जाळूया आळसाला
मीच उज्ज्वल 'भारत'उद्याचा
पटवून देऊ विश्वाला...
✍🏻रचना
© शिल्पा म.वाघमारे
सहशिक्षिका बीड
10/2/19, 
कोणत्याही टिप्पण्या नाहीत:
टिप्पणी पोस्ट करा