पहिला पाऊस

पहिला पाऊस


आला पहिला पाऊस
सारा निसर्ग नाहला
आली तरारुन धरा
धुंद गंध मोहरला ॥

आला पहिला पाऊस
छळे विरही जिवाला
म्हणे सांगतो निरोप
दूर देशी सजनाला ॥

आला पहिला पाऊस
बाहेर आणि आत
वाट पाहता सख्याची
सरे दिन अाणि रात ॥

आला पहिला पाऊस
सार्‍यांसाठीच सोहळा
सार्‍या जगा करी धुंद
माझ्यासाठी का वेगळा? ॥

आला पहिला पाऊस
वणवा रानचा विझला
माझ्या काळजात आग
तिचा भडका उठला ॥

आला पहिला पाऊस
मुक्त मयुर नाचती
विरहिणीच्या जीवाला
काटे बोचरे टोचती ॥

आला पहिला पाऊस
जणू सुखाचा सोहळा
माझ्या नयनीच्या धारा
ओघळती भळाभळा ॥

आला पहिला पाऊस
धरा गेली रे भिजुनी
माझ्या कोमेजल्या राना
तू ही जा ना भिजवूनी ॥

आला पहिला पाऊस
आली मृगाची ही सर
जा रे येऊन साजना
बघ झालासे कहर ॥

✍🏻✍🏻✍🏻रचना.----

 *शिल्पा म.वाघमारे*
     *स.शिक्षिका*
   *मालेगाव खुर्द, 
 ता.गेवराई,जि.बीड*
10/5/19, 22:28