तुळस

तुळस

माझ्या अंगणाची शोभा
चैतन्याची जणू आभा
दर्शनाने धन्य प्रभा
आरोग्याची गं नांदी... १

परसाला आले रुप
लख्ख प्राणवायू दीप
सांज घालावी समीप
तुझ्याच भोवताली... २

पावित्र्याचा तू आदर्श
श्वास फुले, होता स्पर्श
संध्याप्रभातीचा दर्श
तुळसाई माऊली...३

मंजिरीची सुवास तो
घमघमाट गं घुमतो
बाळकृष्णासि भावतो
वृंदे तुझ्या गे मंजुळा... ४

आरोग्यदायिनी माते
भक्तिभावाने पुजिते
दान देई सौभाग्याते
नमामि विष्णूप्रिये...५

शुद्ध कार्तिक द्वादशी
माधवाशी तू बंधशी
होऊनिया पापनाशी
रक्षी रक्षी गं आम्हास... ६


रचना
शिल्पा म. वाघमारे (कुलट) 
अकोला 
दि ५.११.२०१९