आला श्रावण श्रावण
आला श्रावण श्रावण
तप्त झळा ओलावल्या
मने मंदावल्या ज्योती
तया फुलवू लागल्या...१
कधी होई प्रेमसाक्षी
प्रणयास फुलवितो
श्वासाधार बळीचा जो
विरहिण का जाळतो? ..२
प्राजक्ताच्या मृदुलांनी
साजे माहेराची वाट
वाट पाहे गं माऊली
गंधाळते आत आत...३
फांदीवरला हिंदोळा
वारा झुलवतो सई
उंच उंच जाता झोक
मन कालवते बाई...४
पापणीला नाही लव
भाऊ येईल गं आज
किती आवरावं तरी
बाई सरेनाच काज...५
आल्या गौराई माहेरा
सोबतीला गणपती
माझी मलाच गं ठावे
लगबग सांगू किती...६
कसा येई नि जाईही
त्याचा कळेनाच मेळ
अवखळ हा श्रावण
तोच जाणे त्याचा खेळ... ७
रंगी रंगला श्रावण
त्याचा अनोखाच ढंग
मोरपिसातले जणू
ल्याला एक एक रंग... ८
शिल्पा म वाघमारे
स शि मालेगाव खु
ता. गेवराई जि. बीड
कोणत्याही टिप्पण्या नाहीत:
टिप्पणी पोस्ट करा