प्रलयांची नांदी (निसर्ग)

महापूर (अष्टाक्षरी)


   *प्रलयांची नांदी*


सांग आज तुझ्या माझ्या
अस्तित्वाला काय अर्थ
हात झाले तोकडेच
घोर सामोरी अनर्थ १

जल जाळतेया जीवा
तृषा का ते भागवेना
सुन्न झाली स्पंदनेही
डोळा आता पहावेना २

खचलेल्या धरेसवे
तरलेले जीव थोडे
तगमग श्वासांची नि
रिक्त हाती उभे कोडे ३

आसवांची दाटी झाली
महापूर भावनेला
अक्षबांध फुटलेत
आधारही निसटला ४

निराशेच्या गर्तेत त्या
स्तब्ध जीवनप्रवास
प्रलयांची आली नांदी
विरलेत कुंद श्वास ५

कोनाड्यात मनाच्या रे
तेवणारी आस वाहे 
विखुरल्या काळजात
दीप्त तो विश्वास आहे ६

उसवल्या माणसांच्या
 मर्मबंध नि भावना
आपत्तीच हवी का हो?
 जागवण्या संवेदना ७

बाप निसर्ग कोपला
देई मायेची पाखर
वाताहात करताना
आम्हा फळांचा विसर ८

रचना
शिल्पा म वाघमारे
स.शि.बीड
दि.८.९.२०१९