आजी...हरवलेलं नातं
मधाळ पाझर |जणू माय दुजी||
असते ना आजी | आम्हासाठी ||१||
स्पर्श सुसंस्कारी | लाभला मजला||
जन्म हा जाहला | धन्य-धन्य ||२||
रखरखलेला | तिचा कर गाली ||
टोचे बाल्यकाली | चरचर || ३||
आज आठवाने | ओघळती धारा ||
स्पर्श तो गहिरा | प्रेमभरा ||४||
आधार वाड्याचा | जणू की कोंदण ||
शीतल चांदणं | शरदाचं ||५||
तेवती समई | मृदू मंद स्वर ||
कथेचे भांडार | आजी माझी ||६||
अनामिक ऊब | गोडी ती मधाची ||
ओवी हो जात्याची | आजी माझी ||७||
हरीनामी भिजे |ओटा तुळशीचा ||
नाद चैतन्याचा | घुमे कानी ||८||
तिच्या आठवाने| आसवे दाटली ||
गाभारी भेटली | स्वप्नवत||९||
संकुचली मने | नाती विभागली ||
आजी 'हरवली' | सापडे ना ||१०||
